Alle Episoden

Se weten, wo se vun snacken: Anja un Inge leven Platt in emme egen Kitas un delen emme Weten un Erfohren as Fortbildnerinnen mit KollegInnen in anner Inrichtens. De beiden hören to en Team vun Pädagoginnen, de ünnerwegens sünd mit „Platt för de Lütten“ – en Fortbillen-Reeg vun dat Plattdüütsch Zentrum (www.platt.best).

Dat fröhe Lehren vun mehr Spraken is en Chance un en Schatz för’t Leven. Dat is en Mehrweert för de Brägen, as de Wetenschop intwüschen beleggt hett. Un för dat Hart, vunwegen Spraak as Deel vun eens Identität, as en Deel vun tohuus sien. Unse Gäst vertellen vun...

He is man 19 Johr oolt, as Thore Klein de Taktstock vun sien Lüüd ut de Speelmannstog Bredtsedt andragen kriggt un he de Rutfoddern annimmt. Wi snacken över Moot, Strukturen, Provendisziplin, Wettstrieden, Generatschonendiversität un de Insicht „Wat de Tohörers geern hören, dat mögen wi ok geern spelen“. De Antwoort dorto reckt vun „Gruß an Kiel“ bet „Narcotic“, vun traditionelle Origianlmusik bet moderne – ok egen – Arrangements.
En Folg över Drift, Mitenanner un de Lust musikaalsch nie’e Weeg to gahn.

Wat blifft vun en Minsch? Bi dat Familienhöörbook-Projekt kriegen Öllern, för de dat Leven op’t Enn togeiht un de minnerjohrige Kinner hebben, de Gelegenheit ehr Stimm, ehr Geschichten un ehr Leev in en Höörbook fasttoholen – professionell begleidt, finanzeert över Spennen un ahn Kosten för de Familien.

Iris Hansen vertellt, worum se bi dat Familienhöörbook anfungen is to arbeiden, wat ehr an düt besunnere Projekt beweegt un worum lütte Delen för ehr oftmals de gröttste Bedüden hebben. En Snack, de anröhrt, över Torüchdenken, Verbunnenheit un dat, wat opletzt wohrhaftig tellt.

Wenn jem bang sünd, dat jem düt Thema jüst to...

Plattdüütsch hett Regisseur un Sänger Philip Lüsebrink bi sien Arbeit för nedderdüütsche Bühnen quer dörch Noorddüütschland lehrt. He schrifft egen Musikrevuen un gifft Wunschkonzerten in en Hospiz. Wi snacken över dat Potentschal vun Spraak, över Kreativität, Nieschier, wat man dorvun hett, wenn wat scheefgeiht, un worum Fehlers oftmals de beste Weg sünd to wassen.

He kennt sik in Saken Füerwehr ut, as knapp een anner. Al mit teihn Johr över de Jugendafdelen un de Musiktog instegen, is Sören Hansen jümmers noch Füer un Flamm för dat Thema. Intwüschen verdeent he sien Broot as pädagoogsche Leider vun de Landsfüerwehrschool in S-H. In düsse Snack deelt he sien Drift för Brandschuul för Lütt un Groot un för Blaasmusik, sien Sicht op de Chancen vun KI in Utbillen un Insatz un wat man bi de Füerwehr för’t Leven mitnehmen kann.

Glöhnig vun Energie un jümmers geern vörn dorbi: Ina Christiansen Hansen smitt as Standsbeamtin nu ok de Dörpskroog in Löwenstedt un brennt opto för de Römser Speelmannstog. Wo dat to all dat kamen is un wat ehr dat gifft deelt se in düsse Snack över Lust un Luun, Lüüd un Levensfreud, bang för nix un na de Devies "Dat löppt sik torecht un kriegen wi al".

Jann Rothberg is Schullenberader mit Lief un Seel. Na em kamen Lüüd, wenn se finanzjell nich mehr wieder weten. He vertellt vun sien Alldag twüschen Tallen un Levensgeschichten, vull Respekt för Lüüd, de den Moot finnen na Hölp to fragen, wenn se alleen nich mehr wieder weten.

HYROX – en Kombinatschoon ut Lopen un funkschonelle Training – foddert miteens Lief un Geist. Levke vertellt, wat ehr an düsse Sport begeistert, wodennig se de Weg na ehr Work-Life-Balance funnen hett un wat se bito as Content-Createrin op Instagram beschickt.

In de Pilotfolg sünd dree vun unse Hosts noch ünner sik. Dat geiht um’t Kinner kriegen un hebben dörch de Brill vun verscheden Generatschonen, um Ideale un Vörsätze, um Druck un Stütt vun buten, um Raatslääg, de keen bruukt oder de man geern hatt harr, um Alldag un dat grote Aventüer Familie.